Сарыбекова Жамиля Нургалиевна – Жамбыл медициналық колледжінің директоры.
1968 жылы 7 қарашада Оңтүстік Қазақстан облысы, Түлкібас ауданы, Ванновка селосында ұстаздар отбасында дүниеге келген.
1975 жылы Жамбыл қаласындағы А.Сұхамбаев атындағы №25 орта мектепке барып, оны 1985 жылы бітірді.
1985 жылы С.Ж.Асфендияров атындағы Алматы мемлекеттік медицина институтының педиатрия факультетіне түсті.
1991 жылы Алматы мемлекеттік медициналық институтын «Балалар дәрігері» мамандығы бойынша бітірген. Білімі жоғары медициналық.
Еңбек жолын 1991-1994 жылдары аралығында Алматы облыстық балалар ауруханасында балалар дәрігері қызметінен бастаған.
1994-1995 жылдары Оңтүстік Қазақстан облысы, Төле би ауданы, «Бірінші мамыр» ауылында №2 балалар үйінде педиатр қызметін атқарды.
1995-1998 жылдары Шымкент қаласындағы №3 қалалық балалар емханасында учаскелік балалар дәрігері болып жұмыс атқарды.
Жамбыл медициналық колледжіндегі еңбек жолын 1998 жылы анатомия пәнінің оқытушысы болып бастады.
1999-2003 жылдары «Қалыпты анатомия» кабинетінің меңгерушісі қызметін атқарды.
2003-2004 жылдары №1 жалпы кәсіптік пәндер циклдік әдістемелік комиссия төрайымы болып тағайындалды.
2005 жылдан бастап колледж әдіскері, колледждің әдістемелік кабинетінің меңгерушісі.
2013-2016 жылдар аралығында директордың оқу-әдістемелік ісі жөніндегі орынбасарының қызметін атқарды.
2016 жылдың ақпан айынан бастап Жамбыл медициналық колледжі директорының лауазымдық қызметін атқаруда.
Облыс әкімінің Құрмет Грамотасымен, облыстық «Нұр Отан» ХДП-ның Грамотасымен денсаулық сақтау Министірінің Алғыс хатымен марапатталған. Тұрмыс құрған, 4 баласы бар.

   Колледж директоры Ж.Н.Сарыбекованың жетістіктері:

• Ұлттық бизнес рейтингі бойынша «Жыл маманы»  ордені
• «Білімнің дамуына қосқан үлесі» үшін медальі
• «Мәңгілік елдің мәртебелі мұғалімі» медальі
• «Қазақстан Республикасының Тәуелсіздігіне 25 жыл» мерекелік медальі

                Жамбыл медициналық колледжі Қазақстан Республикасындағы орта медициналық және фармацевтикалық мамандар даярлау және қайта даярлап орта кәсіптік білім беретін оқу орындарының бірі.
1936 жылы 12 ақпанда Мирзоян (қазіргі Тараз) қаласында екі жылдық мейірбикелер мектебі құрылып, 30 адам білім алды.
1938 жылы ең алғашқы түлектер мектепті бітіріп шықты. Мектептің алғашқы ұйымдастырушысы және директоры қалалық балалар ауруханасының бас дәрігері Промонтов Иван Нилович болды.
1937-1945 жылдар аралығында «Мейірбикелер» мектебін облыстың бас хирургы, медицина ғылымдарының кандидаты, Тараз қаласының құрметті азаматы Пак Николай Романович басқарды.
1945 жылдан 1948 жылға дейін «Фельдшер-акушерлік» мектебі аталып, мейірбике, фельдшер және акушерлерді дайындап шығарды. 1948 жылы мектепке училище атауы берілді.
1955-1981 жылдар аралығында Жамбыл медициналық училищесін акушер-гинеколог, екі рет «Құрмет белгісі» орденінің иегері, денсаулық сақтау ісінің үздігі Овчинникова Зинаида Павловна басқарды.
1978 жылы училищеде фармация мамандарын даярлауды бастады, ал 1983 жылы мейірбикелерді дайындайтын кешкі оқыту бөлімі ашылды.
1981-1985 жылдар аралығында училищені дәрігер-терапевт Аида Тыныбекқызы Тыныбекова, ал 1985-1990 жылдары – КСРО-ның, ҚР-ның денсаулық сақтау істерінің және білім беру ісінің үздігі, дәрігер-педиатр Рысты Берекелқызы Нұрланова басқарды.
1990-2015 жылдары Жамбыл медициналық колледжін ҚР-ның денсаулық сақтау ісінің үздігі, педагогика ғылымдарының кандидаты Қоңырова Самиха Қоңырқызы басқарды.
2016 жылы колледж директорының лауазымдығына дәрігер-педиатр, жоғары санатты оқытушы Сарыбекова Жамиля Нұрғалиқызы тағайындалды.
1994 жылы Жамбыл медициналық училищесі атауы Жамбыл медициналық колледжіне ауыстырылды.
1996 жылы Жамбыл медициналық колледжінде орта медициналық және фармацевтикалық білімі бар мамандардың біліктілігін көтеру және қайта даярлау бөлімі ашылды.
Қазіргі таңда колледжде «Емдеу ісі» мамандығы бойынша біліктілігі «Фельдшер», «Акушер», «Мейірбике ісі» және «Фармация» мамандықтарын даярлайды.